നിശ്ചയിച്ച് ഉറപ്പിച്ച വിവാഹത്തില്‍ നിന്നും താന്‍ പിന്മാറുകയാണെന്ന് വൈക്കം വിജയലക്ഷ്മി.

വിവാഹത്തിന് മുമ്പ പറഞ്ഞുറപ്പിച്ച വ്യവസ്ഥകളില്‍ നിന്ന് പ്രതിശ്രുതവരന്‍ പിന്‍വാങ്ങുന്നതിനാലാണ് ഈ വിവാഹം വേണ്ടെന്ന് വയ്ക്കുന്നതെന്ന് വിജയലക്ഷ്മി പറഞ്ഞു. വാര്‍ത്താസമ്മേളനത്തിലൂടെ വിജയലക്ഷ്മി തന്നെയാണ് ഇക്കാര്യം മാധ്യമങ്ങളെ അറിയിച്ചത്. തൃശൂര്‍ സ്വദേശിയായ സന്തോഷുമായുള്ള വിവാഹത്തില്‍ നിന്നാണ് വൈക്കം വിജയലക്ഷ്മി പിന്മാറിയിരിക്കുന്നത്. മാര്‍ച്ച് 29നായിരുന്നു വിവാഹം തീരുമാനിച്ചിരുന്നത്. എന്നാല്‍ സന്തോഷത്തിന്റെ പെരുമാറ്റത്തില്‍ വന്ന മാറ്റമാണ് വിവാഹത്തില്‍ നിന്ന് പിന്മാറാന്‍ നിര്‍ബന്ധിതയാക്കിയതെന്ന് വിജയലക്ഷ്മി പറഞ്ഞു.
വിവാഹശേഷം സംഗീത പരിപാടികളുമായി മുന്നോട്ടുപോകുന്നതിനെ സന്തോഷ് വിലക്കിയാണ് ഇത്തരമൊരു തീരുമാനമെടുക്കാന്‍ പ്രേരിപ്പിച്ചതെന്നും അവര്‍ വ്യക്തമാക്കി. ഏതെങ്കിലും സംഗീത സ്‌കൂളില്‍ അധ്യാപികയായി ജോലി ചെയ്താല്‍ മതിയെന്നാണ് സന്തോഷ് പറഞ്ഞത്. ഇത് തനിക്ക് അംഗീകരിക്കാനാവില്ലെന്നും അവര്‍ പറഞ്ഞു. മാതാപിതാക്കളില്ലാത്ത സന്തോഷ് വിവാഹശേഷം തന്റെ വീട്ടില്‍ താമസിക്കാമെന്ന് നേരത്തെ സമ്മതിച്ചിരുന്നു. എന്നാല്‍ ഇപ്പോള്‍ വിവാഹശേഷം തന്റെ ബന്ധുവീട്ടില്‍ താമസിക്കാമെന്നാണ് സന്തോഷ് പറയുന്നത്. ഇക്കാരണങ്ങള്‍ കൊണ്ടാണ് വിവാഹത്തില്‍ നിന്നും പിന്മാറാന്‍ തീരുമാനിച്ചതെന്നും വിജയലക്ഷ്മി വ്യക്തമാക്കി.
തങ്ങളുടെ വീട്ടില്‍ താമസിക്കാം, വിജയലക്ഷ്മിയുടെ സംഗീത ജീവിതത്തിന് തടസമുണ്ടാക്കില്ല തുടങ്ങിയ തങ്ങള്‍ മുന്നോട്ടുവെച്ച ആവശ്യങ്ങള്‍ സന്തോഷ് അംഗീകരിച്ചിരുന്നതാണെന്ന് വിജയലക്ഷ്മിയുടെ പിതാവ് വി. മുരളീധരനും പറഞ്ഞു. സെല്ലുലോയ്ഡ് എന്ന ചിത്രത്തിലൂടെ പിന്നണിഗായികയായെത്തിയ വൈക്കം വിജയലക്ഷ്മി മികച്ച ഗായികയ്ക്കുള്ള സംസ്ഥാന അവാര്‍ഡ് കരസ്ഥമാക്കിയിരുന്നു.
Show More

Related Articles

Close
Close